काठमाडौँ । प्रतिनिधिसभा सदस्य निर्वाचनको समानुपातिक प्रणालीअन्तर्गतको कार्यक्रम मंसिर २० गतेदेखि औपचारिक रूपमा सक्रिय हुँदैछ। आयोगले कान्तिपथस्थित कार्यालयमा समानुपातिक निर्वाचन अधिकृतको कार्यालय स्थापना गरेसँगै तयारीको काम सुरु भएको हो।

निर्वाचन आयोगले स्वीकृत गरेको कार्यतालिकाअनुसार मंसिर २१ देखि २३ गते अपराह्न ४ बजे सम्म समानुपातिक प्रणालीमा सहभागी हुन इच्छुक दलहरूले निवेदन दर्ता गर्न सक्नेछन्। त्यसपछि मंसिर २४ मा निवेदन पेस गर्ने दलहरूको सूची सार्वजनिक गरिने छ।

उम्मेदवार चयन प्रक्रियाअनुसार पुस १३ र १४ गते बन्दसूची (क्लोज्ड लिस्ट) दर्ता गरिनेछ भने माघ २० गते सो सूचीको अन्तिम प्रकाशन हुनेछ।

समानुपातिकतर्फको कार्यालयको उद्घाटन कार्यवाहक प्रमुख निर्वाचन आयुक्त रामप्रसाद भण्डारीले गरे। सचिव महादेव पन्थ मुख्य निर्वाचन अधिकृत तथा सहसचिव यज्ञप्रसाद भट्टराई सहायक निर्वाचन अधिकृतका रूपमा जिम्मेवारीमा छन्। व्यवस्था सञ्चालनका लागि ४१ कर्मचारी खटाइनेछन्।

आयुक्त भण्डारीले जातीय, भौगोलिक, लैंगिक तथा विविध समूहको प्रतिनिधित्व सुनिश्चित गर्दै सूत्रात्मक पद्धतिबाट उमेदवार टुंग्याइने भएकाले सबै पक्षको विश्वास कायम रहने बताए।

विद्यमान कानुनअनुसार प्रतिनिधिसभामा २७५ सदस्य रहनेछन्—१६५ प्रत्यक्ष र ११० समानुपातिक तर्फबाट। प्रत्यक्ष प्रणाली (पहिलो हुने विजयी) अन्तर्गत माघ ६ गते उम्मेदवारी मनोनयन हुने कार्यक्रम तय गरिएको छ।

यसैबीच अर्थमन्त्री रामेश्वरप्रसाद खनाल र कानुनमन्त्री अनिलकुमार सिन्हाले निर्वाचन आयोगका आयुक्तहरूसँग बैठक गर्दै निर्वाचन सफलताका लागि सरकारले पुर्‍याउनुपर्ने सहयोगबारे छलफल गरेका छन्।