काठमाडौं, सिंहदरबार जलिरहँदा खुसी मनाएको फोटो ‘भाइरल’ भएपछि जेन जी आन्दोलनकी अगुवा रक्षा बमले आफु कारबाहीको लागि तयार रहेको बताएकी छन । बमले आफूमाथि लागेका विभिन्न आरोपहरूको खण्डन गर्दै सरकारसमक्ष आन्दोलनका क्रममा भएका हरेक फौजदारी कसुरमा निष्पक्ष छानबिनको माग गरेकी छन । एक भिडियो सन्देशमार्फत उनले भनेकी छन  मेरो एउटा फोटो जुन सिंहदरबारअगाडि मैले खिचेको थिएँ, त्यो सेप्टेम्बर ९ को फोटो थियो, त्यो पनि सामाजिक सञ्जालमा भाइरल भइरहेको छ ।

त्यो फोटोसम्बन्धी पनि यहाँहरूलाई धेरै प्रश्नहरू छन । सेप्टेम्बर ८ मा हामीमाथि जे व्यवहार भयो । त्यसको आक्रोशलाई लिएर हामी सेप्टेम्बर ९ मा आन्दोलनमा उत्रिएका थियौँ । प्रधानमन्त्रीको राजीनामा मागिरहेका थियौँ, त्यहीबेला प्रधानमन्त्रीको राजीनामा आएको थियो । सिंहदरबार हाम्रो राज्यको प्रतीक भएको हिसाबले एउटा विम्ब स्वरुप मैले हामीले जित्यौँ भनेर जितको खुसी मनाएर त्यहाँनेर फोटो राखेको थिएँ । त्योभन्दा बाहेक त्यो फोटो केही पनि थिएन । त्यतिबेला सिंहदरबारको गेट जलिरहेको थियो, म आक्रोशित थिएँ ।

एक किसिमको जितजस्तो महसुस भएर मैले त्यो फोटो राखेको हो ।’ उनले यसमाथि अनुसन्धान हुनुपर्ने बताउँदै गोली चलाउनेमाथि पनि अनुसन्धान गर्न सरकारसमक्ष माग राखिन । ‘हरेक फौजदारी लाग्ने कसुरहरूमा कारबाही गर्नको लागि सरकार तयार हुनुपर्छ । सुरुवात मबाट नै हुने हो भने म पनि तयार छु’, उनले भनिन । उनले आफूमाथि राजनीतिक आबद्धताको विषयलाई लिएर चर्चा हुने गरेकोप्रति पनि आपत्ति जनाएकी छन । उनले आफू कुनै राजनीतिक दलमा आबद्ध नरहेको स्पष्ट पारेकी छन । साथै, आफूमाथि लाग्ने गरेको विदेशी शक्तिसँगको सम्बन्धलाई उनले गलत भनेकी छन । यस्तै उनले अघि भनेकी छिन ‘तत्कालीन सरकारले हामी र हाम्रा साथीहरूमाथि गोली दागेको थियो, बर्बरतापूर्वक हाम्रा साथीहरूको हत्या गरेको थियो,’ उनले भनिन । शान्तिपूर्ण रूपमा सुरु गरिएको आन्दोलनमा अराजकता फैलिएको र धेरै साथीहरू गुमाउनु परेको उनको भनाइ छ ।

रक्षा बमले केही समयअघि काठमाडौं महानगरपालिकाले सडक व्यापारीहरूमाथि गरेको दमनको विरोधमा ‘गरिखाना देउ’ अभियान चलाएको जानकारी दीन । यस अभियानअन्तर्गत महानगरपालिकाअगाडि १०९ घण्टा उभिएर जवाफदेहिता माग गरिएको थियो । यस्तै, लुम्बिनीदेखि सिंहदरबारसम्म पैदलयात्रा गरी सुझावपत्र तत्कालीन प्रधानमन्त्री प्रचण्डलाई बुझाएको फोटो सामाजिक सञ्जालमा भाइरल भएको थियो । यो फोटोलाई लिएर उनलाई माओवादीको झोले भनिएको थियो । उनले आफ्नो नाम कुनै एक राजनीतिक पार्टीको सदस्यसँग मिल्ने भएकाले आफूलाई ‘एमाले’ भनिएको र अन्य किसिमका आरोप लगाइएकोमा आपत्ति जनाइन । रक्षा बमले आफूलाई आउने मृत्युका धम्की र बलात्कारका धम्कीले कुनै फरक नपर्ने बताउँदै आफू खुट्टा कमाउने मान्छे नभएको बताइन ।