काठमाडौँ । नेपालकै पहिलो आधुनिक सुरुङमार्ग ‘सिस्नेखोला–नागढुंगा’ सोमबारदेखि सञ्चालनमा आएको छ। पूर्वाधार विकासमन्त्री सुनील लम्साल, नेपालका लागि जापानी राजदूत माएदा तोरु र जाइका नेपालका प्रतिनिधिको उपस्थितिमा सुरुङमार्ग उद्घाटन गरिएको हो।

यो आयोजनाको सुरुवातसँग जोडिएको नाम पूर्वप्रधानमन्त्री तथा एमाले अध्यक्ष केपी शर्मा ओलीको पनि हो। ओली नेतृत्वको सरकारले २०७६ सालमा सुरुङमार्गको शिलान्यास गर्दै निर्माणलाई प्राथमिकतामा राखेको थियो। यद्यपि, आयोजनाको विकासक्रम भने विभिन्न सरकारसँग जोडिएको छ। यसको सम्भाव्यता अध्ययन झलनाथ खनाल र डा. बाबुराम भट्टराई प्रधानमन्त्री रहेका बेला सुरु भएको थियो भने मुख्य सुरुङको ब्रेकथ्रु पुष्पकमल दाहाल ‘प्रचण्ड’ प्रधानमन्त्री रहेका बेला सम्पन्न भएको थियो।

जापानको सहुलियत ऋण र नेपाल सरकारको लगानीमा निर्माण भएको यो आयोजना कोभिड महामारी, प्राविधिक समस्या र अन्य अवरोधका कारण निर्धारित समयभन्दा ढिलो सञ्चालनमा आएको हो।

सुरुवाती चरणमा सुरुङमार्गबाट एम्बुलेन्स, दमकल, प्रहरीलगायत आपतकालीन सवारीलाई मात्र प्रवेश दिइएको छ। मोटरसाइकल, तीनपांग्रे सवारी तथा पेट्रोल, डिजेल, एलपी ग्यासजस्ता प्रज्वलनशील पदार्थ बोकेका सवारीलाई प्रवेश दिइने छैन। करिब १५ दिनसम्म शुल्क नलिइने र त्यसपछि शुल्कबारे निर्णय गरिने आयोजनाले जनाएको छ।

आयोजना उद्घाटनसँगै विकासका कामलाई कुनै एक व्यक्ति वा सरकारको मात्र उपलब्धिका रूपमा नभई निरन्तर प्रक्रियाका रूपमा हेर्नुपर्ने बहस पनि सुरु भएको छ। विगतका नेतृत्वले सुरु गरेका सकारात्मक योजनालाई सम्मान गर्दै नयाँ सरकारले पनि यस्ता पूर्वाधारलाई निरन्तरता दिनुपर्ने आवश्यकता देखिएको छ।

नेपालको सडक पूर्वाधारमा नयाँ सुरुवात गरेको यो सुरुङमार्गले सुरक्षित, सहज र छरितो यात्राको आधार तयार गरेको छ। आगामी दिनमा यस्तै आधुनिक पूर्वाधार निर्माणले गति लिन सके नागरिकले थप सुविधा पाउने अपेक्षा गरिएको छ।