काठमाडौं- बीबीसीका महानिर्देशक टिम डेवीले अमेरिकी राष्ट्रपति डोनाल्ड ट्रम्पको एक वृत्तचित्र (डकुमेन्ट्री)मा एडिट गरिएको भाषण राखिएको विवादपछि आइतबार आफ्नो पदबाट राजीनामा दिएका छन् । अमेरिकी राष्ट्रपतिले विवादको बीचमा बीबीसीमाथि आक्रमण गर्दै ‘भ्रष्ट पत्रकारहरू’ भएको आरोप लगाएका थिए ।

यसअघि, टिम डेवी र बीबीसी समाचार प्रमुख डेबोरा टर्नरले बीबीसीको प्रमुख पानोरामा कार्यक्रमअन्तर्गत प्रसारित एक वृत्तचित्रमा ट्रम्पको भाषण एडिट गरिएको आरोप लागेपछि राजीनामा दिएका थिए । सम्पादनका कारण उक्त भाषण भ्रामक देखिएको बताइएको थियो ।

यसबारे प्रतिक्रिया दिँदै ट्रम्पले भनेका छन्, “भ्रष्ट पत्रकारहरूको पर्दाफास भएको छ । यी धेरै बेइमान मानिसहरू हुन्, जसले राष्ट्रपति चुनावको परिणाममा प्रभाव पार्ने प्रयास गरेका थिए ।”

राजीनामाको घोषणा गर्दै डेवीले बीबीसीको वेबसाइटमा प्रकाशित वक्तव्यमा भनेका छन्, “बीबीसीसहित कुनै पनि सार्वजनिक संस्था त्रुटिरहित हुँदैन । हामी सधैँ खुला, पारदर्शी र जवाफदेही रहनुपर्छ । यद्यपि, यही मात्र कारण होइन । तर, बीबीसी न्युज वरिपरि चलिरहेको वर्तमान बहसले मेरो निर्णयमा स्वाभाविक रूपमा योगदान पुर्‍याएको छ । अन्ततः मैले नै जिम्मेवारी लिनुपर्छ ।”

यो विवाद सन् २०२१ जनवरी ६ मा ट्रम्पले दिएको भाषणसँग सम्बन्धित क्लिपहरूलाई लिएर उठेको हो । सो भाषणका कारण ट्रम्पमाथि यूएस क्यापिटलमा भीडलाई उक्साएको आरोप लागेको थियो । ती भीडले चुनाव हारिसकेका ट्रम्पलाई सत्तामा कायम राख्न माग गरिरहेका थिए ।

बीबीसीको वृत्तचित्रमा देखिएको एडिट गरिएको अंशमा ट्रम्पले आफ्ना समर्थकहरूलाई ‘यूएस क्यापिटलसम्म सँगै हिँड्ने र नर्क जस्तै लड्ने’ भनिरहेको देखिन्छ ।

तर, मूल क्लिपमा ट्रम्पले भनेका थिए, “हामी हाम्रा बहादुर सिनेटरहरू र कांग्रेसका पुरुष र महिलाहरूको जयजयकार गर्न जाँदैछौँ ।”

एडिट गरिएको यो भाषण ‘ट्रम्पः ए सेकेन्ड चान्स ?’ नामक वृत्तचित्रमा समावेश गरिएको थियो, जसलाई गत वर्षको अमेरिकी चुनावभन्दा एक हप्ताअघि बीबीसीले प्रसारण गरेको थियो ।

पछिल्लो विवाद यस हप्ता डेली टेलिग्राफको रिपोर्टपछि चर्किएको हो । उक्त रिपोर्टमा बीबीसीको सम्पादकीय स्ठ्यान्डर्ड समितिका पूर्वबाह्य सल्लाहकार माइकल प्रेस्कटले निष्पक्षतासम्बन्धी मेमोमार्फत चिन्ता व्यक्त गरेको खुलासा गरिएको थियो ।

यसअघि आइतबार, बेलायतकी संस्कृति, मिडिया र खेलमन्त्री लिसा नन्दीले यी आरोपहरूलाई ‘अविश्वसनीय रूपमा गम्भीर’ बताएकी थिइन् । त्यसपछि बीबीसीले सोमबारसम्म संसद्को संस्कृति, मिडिया र खेल समितिलाई पूर्ण प्रतिक्रिया दिने वाचा गरेको छ । बीबीसी