सुर्खेत। दशैँको अवसरमा ठूलो सपना बोकेर ऋण निकालेर किनिएको गाडी बिहीवार कर्णाली नदीको गहिराइमा बेपत्ता छ । त्यससँगै बेपत्ता भएका छन् । पञ्चपुरी नगरपालिका-८ स्थित माझीगाउँका दुई सहोदर दाजु-भाइ-चालक २९ वर्षीय तुलाराम सुवेदी र सहचालक ३१ वर्षीय रामु सुवेदी । बिहीबार बिहान करिब ११ः३० बजे सुर्खेतबाट कालिकोटका लागि छुटेको कर्णाली प्रदेश ०२–००१ ख १०५५ नम्बरको यात्रुवाहक गाडी दैलेखको चामुण्डाबिन्द्रासैनी नगरपालिका–७ स्थित साङ्गेतडामा सडकबाट करिब ४०० मिटर तल कर्णाली नदीमा खसेको थियो ।

दुर्घटनापछि नदीमा पानीको बहाव बढेको, जलसतह उच्च भएको र धमिलो पानीका कारण गाडी अझैसम्म फेला पर्न सकेको छैन । घटनाले सबैभन्दा बढी शोकमा डुबाएको छ पञ्चपुरी नगरपालिका–८ माझीगाउँस्थित सुवेदी परिवारलाई । चालक तुलाराम र सहचालक रामु सहोदर दाजु–भाइ भएको खुलेको छ । उनीहरू दुवैको अवस्था अझै अज्ञात छ । परिवारका सदस्य राजकुमार सुवेदीका अनुसार तुलारामले गएको दशैँमा ऋण निकालेर उक्त गाडी किनेका थिए । गाडी किन्नुअघि उनी अरूकै गाडी चलाएर जीविकोपार्जन गर्दै आएका थिए । आफ्नै गाडी किन्ने सपना पूरा भएपछि उनले भारतमा रोजगारी गरिरहेका आफ्ना दाइ रामुलाई पनि घर फर्काएर सहचालकको रूपमा सँगै काम गर्न बोलाएका थिए । तर परिवारको भविष्य बदल्ने आशा बोकेको त्यही गाडी अहिले कर्णाली नदीमा हराएको छ । राजकुमारका अनुसार दुवै दाजु–भाइका श्रीमती र स–साना छोराछोरी छन् ।

दुर्घटनाको खबर पाएपछि उनीहरू कलिला सन्तान च्यापेर घटनास्थल पुगेका छन् । आफ्ना श्रीमानको कुनै अत्तोपत्तो नहुँदा परिवारजनको पीडा झन् गहिरिएको छ । राजकुमारका अनुसार गाउँभरि अहिले दुई भाइ सकुशल भेटिऊन् भन्ने प्रार्थना सुनिन्छ । यता, दुर्घटनामा गाडीमा कति यात्रु सवार थिए भन्ने विवरण अझै खुलेको छैन । दैलेखका प्रहरी प्रमुख डीएसपी श्रवणकुमार विश्वकर्माका अनुसार गाडीको खोजी जारी रहे पनि नदीको प्रतिकूल अवस्थाका कारण उद्धार कार्य चुनौतीपूर्ण बनेको छ । सशस्त्र प्रहरी बल नेपाल नम्बर ६ महेश्वरी बाहिनी मुख्यालय सुर्खेतबाट गोताखोर टोली घटनास्थलमा परिचालन गरिएको छ ।

महेश्वरी बाहिनीका प्रहरी उपरीक्षक करणसिंह धामीले कर्णाली नदीको अत्यधिक धमिलो पानीका कारण खोजी तथा उद्धार कार्यमा कठिनाइ भइरहेको बताए । सुरक्षाकर्मी र स्थानीय बासिन्दा निरन्तर खोजीमा जुटिरहेका छन् । तर नदीको तीव्र बहाव र धमिलो पानीका कारण थप विवरण खुल्न सकेको छैन् ।